Bu il müşahidə olunan El-Ninyo hadisəsinin indiyədək qeydə alınan ən güclü səviyyələrdən birinə çatmaq yolunda olduğu bildirilir.
“Operativ Məlumat Mərkəzi-OMM” xəbər verir ki, bununla bağlı xarici KİV məlumat yayıb.
İqlim alimləri xüsusilə Sakit okeanda güclənən El-Ninyonun son 150 ilin ən şiddətli hadisəsinə çevrilə biləcəyi barədə xəbərdarlıq edirlər.
Okeandan atmosferə böyük miqdarda istilik yayılması insan fəaliyyəti nəticəsində yaranan qlobal istiləşmə ilə birləşərək qarşıdakı ili tarixdə qeydə alınmış ən isti il edə bilər.
Mütəxəssislər El-Ninyonun pik həddinin əvvəlki rekordları nəzərəçarpacaq fərqlə üstələyəcəyini proqnozlaşdırırlar.
Hadisənin yağıntı rejiminə, temperatur göstəricilərinə və qasırğaların hərəkətinə ciddi təsir göstərəcəyi bildirilir.
Prosesin davam etməsi ilə 2027-ci ildə qlobal orta temperaturun sənayedən əvvəlki dövrlə müqayisədə 1,7 dərəcə Selsi yüksək ola biləcəyi qeyd edilir. Bu göstərici Paris Sazişində müəyyən edilən 1,5 dərəcəlik kritik həddən xeyli yüksəkdir.
ABŞ Milli Okean və Atmosfer Administrasiyası (NOAA) El-Ninyo şəraitinin ən azı 2027-ci ilin aprelinə qədər davam etməsinin demək olar ki, qaçılmaz olduğunu açıqlayıb. 2026-cı il ərzində temperatur göstəricilərinin yeni rekord səviyyələrə çatması ehtimalının da yüksək olduğu bildirilib.
El-Ninyonun səbəb ola biləcəyi quraqlıq, ekstremal istilər, daşqınlar və meşə yanğınları qlobal iqtisadiyyat üçün də ciddi təhlükə yaradır. Tədqiqatçılar mövcud vəziyyətin 2032-ci ilə qədər dünya iqtisadiyyatına 10 trilyon dollar həcmində zərər vura biləcəyini hesablayırlar.
Goldman Sachs analitikləri “Super El-Ninyo”nun qlobal ərzaq qiymətlərində 15,8 faizlik artıma səbəb ola biləcəyini vurğulayıblar.
Xüsusilə Hindistanda musson yağışlarının azalması nəticəsində buğda, düyü və şəkər qamışı istehsalının mənfi təsirlənəcəyi gözlənilir. Avropa Mərkəzi Bankı isə əsas ərzaq məhsullarının qiymətlərinin 9 faizə qədər arta biləcəyi barədə xəbərdarlıq edib.
Okean temperaturunun yüksəlməsi mərcan riflərində kütləvi ağarmalara səbəb olaraq dəniz ekosistemlərini də təhlükə altına salır.
Bundan əlavə, okeanların atmosferdən udduğu xalis karbonun miqdarının azalacağı bildirilir.
Alimlər qlobal istiləşmənin El-Ninyonu gücləndirib-gücləndirmədiyini, yoxsa El-Ninyonun qlobal istiləşmə prosesini sürətləndirib-sürətləndirmədiyini müəyyənləşdirmək üçün araşdırmaları davam etdirirlər.
