Daxili İşlər Nazirliyi (DİN) azad olunan bölgələrdə çalışan şəxsləri ictimai təhlükəsizlik qaydalarına ciddi əməl etməyə çağırıb.

"Operativ Məlumat Mərkəzi-OMM" xəbər verir ki, bu barədə DİN-in Mətbuat Xidməti məlumat yayıb.

Bildirilib ki, bölgədə abadlıq, tikinti, quruculuq işlərinə cəlb edilən şəxslərdən xahiş edirik ki, silah-sursat, partlayıcı maddələrə, şübhəli əşyalara rast gəldikdə, aşkarladıqda DİN-in 102 Zəng Mərkəzinə, yaxud ərazidə xidmət aparan polis əməkdaşlarına məlumat versinlər.

Hərbi təyinatlı əşyalara mülki şəxslərin toxunması həyat və sağlamlığa təhlükə yaratmaqla yanaşı, həmin əşyaları götürmək, daşımaq, saxlamaq, başqasına vermək cinayət məsuliyyətinə səbəb olur.

"Qeyd olunanları nəzərə alaraq, bir daha bölgədə çalışan şəxsləri ictimai təhlükəsizlik qaydalarına ciddi əməl etməyə çağırırıq", - deyə məlumatda vurğulanıb.

Malik Ələkbərov Ədliyyə Nazirliyinin Cəzaların İcrasına Nəzarət Baş İdarəsinin rəisi vəzifəsindən azad edilib.

Nazirlikdən "Operativ Məlumat Mərkəzi-OMM"-ə məlumatı təsdiqləyiblər.

Bildirilib ki, dövlət başçısının fərmanı ilə Ədliyyə Nazirliyində struktur dəyişikliyi həyata keçirilib: "Bununla əlaqədar Malik Ələkbərov vəzifəsindən azad edilərək sərəncama götürülüb".

Qeyd olunub ki, Ədliyyə Nazirliyinin Cəzaların İcrasına Nəzarət Baş İdarəsinin rəisi vəzifəsinin icrası İlham Abasquliyevə həvalə edilib.

Azərbaycan Respublikasının Birinci vitse-prezidenti Mehriban Əliyeva Milli Qurtuluş Günü münasibətilə sosial şəbəkədə paylaşım edib.

"Operativ Məlumat Mərkəzi-OMM" paylaşımı təqdim edir:

Bu gün Azərbaycanın gözəl guşəsi olan, dəmirağacın məskəni sayılan Lənkəran rayonunda Çexiya-Azərbaycan xalqlarının dostluq rəmzinə çevrilən “Dəmirağacı parkı”ndan danışmağın mənə böyük şərəf hissi verdiyini qürurla qeyd edirəm.

"Operativ Məlumat Mərkəzi-OMM" xəbər verir ki, bunu Çexiyanın Azərbaycandakı səfiri Milan Sedlaçek jurnalistlərə açıqlamasında deyib.

Onun sözlərinə görə, ilk dəfə burada 2023-cü ildə Ekologiya və Təbii Sərvətlər Nazirliyi ilə birgə 100 dəmirağacı əkdik: "Bu il də böyük həvəslə “Yaşıl dünya naminə həmrəylik ili” və Azərbaycanda keçiriləcək COP29 çərçivəsində “Dəmirağacı parkı”nın genişləndirilməsi işlərini davam etdirərək aprel ayında daha 101 ağac əkdik. Azərbaycanda insanların təbiətə olan sevgisi, ağac əkmək istəyənlərin bu qədər çox olması, böyük coşqu ilə belə tədbirlərdə iştirak etmələri məni çox sevindirir. Düşünürəm ki, ağacəkmə tədbirinin hər il davam etməsi "Dəmirağacı parkı"nın daha da genişlənməsinə, ətraf mühitin qorunmasında birgə əməkdaşlığımızın güclənməsinə və xalqlarımız arasında dostluq əlaqələrinin daha da möhkəmlənməsinə vəsilə olacaq”.

Diplomat bildirib ki, "Dəmirağacı parkı"nın salınmasında səfirliyin nümayəndələri, Ekologiya və Təbii Sərvətlər Nazirliyinin, Lənkəran Şəhər İcra Hakimiyyətinin rəsmiləri, tələbələr və rayon ictimaiyyəti yaxından iştirak edib. Sevindiricidir ki, birgə ərsəyə gətirdiyimiz dəmirağacı parkında ağacların bitiş faizi 100 %-dir: "Əminəm ki, illər sonra saldığımız dəmirağacı parkı böyük bir meşəyə çevriləcək və xalqlarımızın daha bir dostluq rəmzi kimi yadda qalacaq. Mən bunu, Azərbaycanda ətraf mühit və yaşıllaşdırma sahəsində həyata keçirilən genişmiqyaslı tədbirlərə töhfə hesab edirəm və böyük bir uğur kimi qiymətləndirirəm".

M.Sedlaçek qeyd edib ki, "Dəmirağacı parkı"nın salınması ilə yanaşı, Azərbaycanda ekoturizm fəaliyyətinin daha müasir standartlara uyğun qurulması məqsədilə 2019-cu ildən başlayaraq Ekologiya və Təbii Sərvətlər Nazirliyi ilə səfirliyin əməkdaşlıq proqramı çərçivəsində Hirkan Milli Parkında turizm cığırının “çex modeli” üzrə nişanlanması tədbiri də həyata keçirilib və turist marşrutları yeni nişanlarla tənzimlənib: "Ətraf mühitin mühafizəsi ilə bağlı əməkdaşlığımız bundan sonra da uğurla davam edəcək və iki xalq arasındakı dostluğun ömrü dəmirağacı kimi uzunömürlü və möhkəm olacaq".

Qaçqınların və Məcburi Köçkünlərin İşləri üzrə Dövlət Komitəsi 15 İyun – Milli Qurtuluş Gününə həsr olunmuş “Qarabağ bizimdir! “Qarabağ Azərbaycandır” adlı fləşmob təşkil edib.

Bu barədə "Operativ Məlumat Mərkəzi-OMM"-ə Dövlət Komitəsindən məlumat verilib.

Bildirilib ki, fləşmobda Abşeron rayonunun Masazır qəsəbəsində məcburi köçkünlər üçün salınmış yaşayış kompleksində müvəqqəti məskunlaşmış ailələrdən olan məktəblilər iştirak ediblər.

Azərbaycan Prezidenti İlham Əliyev Şuşada keçirilən “Türk Dövlətləri Təşkilatı: geosiyasi reallıqlar və qlobal kataklizmlər fonunda yeni strateji hədəflərə doğru” beynəlxalq konfransın iştirakçılarına müraciət ünvanlayıb.

"Operativ Məlumat Mərkəzi-OMM" xəbər verir ki, mətndə deyilir: 

"Hörmətli konfrans iştirakçıları!

Sizi “Türk Dövlətləri Təşkilatı: geosiyasi reallıqlar və qlobal kataklizmlər fonunda yeni strateji hədəflərə doğru” mövzusunda beynəlxalq konfransın keçirildiyi, Türk dünyasının mədəniyyət paytaxtı olmuş Şuşa şəhərində səmimi-qəlbdən salamlayır, konfransın işinə uğurlar arzulayıram.

Müasir dövrdə qlobal kataklizmlər beynəlxalq münasibətlər sisteminin geosiyasi reallıqlarından birinə çevrilmişdir. Xarici güc mərkəzlərinin təsiri və müdaxiləsi ilə dünyanın müxtəlif regionlarında çoxsaylı qarşıdurmaların – etnik və dini zəmində münaqişələrin, siyasi konfrontasiyaların baş verməsi, xaos və anarxiya mühitinin yaranması ayrı-ayrı dövlətlərə və bütövlükdə beynəlxalq təhlükəsizliyə ciddi təhdidlər yaratmaqdadır. Beynəlxalq hüquq normalarının kobudcasına pozulduğu və ikili standartlara əsaslanan selektiv yanaşmaların baş qaldırdığı belə bir şəraitdə milli maraqların qorunmasına hədəflənmiş və mövcud çağırışlara cavab verən siyasətin həyata keçirilməsi müstəqil dövlətlərin qarşısında duran başlıca vəzifələrdəndir.

Son zamanlarda yeni strateji hədəflərə doğru inamla irəliləyərək dünya siyasətində yüksələn güc mərkəzinə çevrilən, beynəlxalq nüfuzu və geosiyasi təsir imkanları artmaqda olan Türk Dövlətləri Təşkilatında birləşən ölkələr də analoji çağırışlarla üzləşirlər. Yeni ittifaq modeli kimi dünyanın diqqət mərkəzində olan bu təşkilatda təmsil olunan ölkələrin sıx həmrəylik şəraitində dostluq və qardaşlıq prinsiplərinə, qarşılıqlı anlaşmaya, bərabərhüquqlu tərəfdaşlığa və çoxşaxəli əməkdaşlığa əsaslanan münasibətləri həm milli və regional səviyyədə, həm də qlobal miqyasda sabitliyə, təhlükəsizliyə və inkişafa xidmət edən çox önəmli amildir.

Heç şübhəsiz, Türk Dövlətləri Təşkilatında bir araya gələn ölkələrin siyasi partiyalarının qarşılıqlı faydalı əməkdaşlığı da müştərək məqsədlərin həyata keçirilməsində əhəmiyyətli rol oynayır.

Əminəm ki, Azərbaycan xalqı üçün əlamətdar olan mühüm tarixdə – Milli Qurtuluş Günündə və Şuşa Bəyannaməsinin imzalanmasının növbəti ildönümündə Yeni Azərbaycan Partiyasının təşkilatçılığı ilə “İslam dünyasının mədəniyyət paytaxtı” Şuşa şəhərində keçirilən, bu səbəbdən xüsusi rəmzi mənaya və mənəvi-siyasi önəmə malik bu tədbirin ölkələrimiz arasında çoxşaxəli münasibətlərin inkişafına, Türk dünyasında birliyin daha da möhkəmlənməsinə, yeni hədəflərin reallaşmasına dəyərli töhfələr verəcəkdir.

Fürsətdən istifadə edərək, milli-mənəvi dəyərlərimizin və İslam mədəniyyətinin mühüm tərkib hissəsi olan müqəddəs Qurban bayramı münasibətilə hər birinizi ürəkdən təbrik edir, sizə möhkəm cansağlığı və fəaliyyətinizdə yeni nailiyyətlər diləyirəm".