Afət Ziyadqızı
Sakit okeanın cənub-qərb hissəsində yerləşən Vanuatu Respublikasının sahillərində 6,3 maqnitudalı güclü zəlzələ baş verib.
"Operativ Məlumat Mərkəzi-OMM" xəbər verir ki, Türkiyənin "TRT Haber" telekanalının Birləşmiş Ştatların Geoloji Xidmətinə (USGS) istinadən yaydığı məlumata əsasən, təbii fəlakətin episentri Port-Olri yaşayış məntəqəsindən 197 kilometr şimal-qərbdə, dəniz akvatoriyasında yerləşib.
Məlumata görə, yeraltı təkanların ocağı 16 kilometr dərinlikdə qeydə alınıb. Seysmoloji mərkəzlər tərəfindən zəlzələdən sonra sunami təhlükəsinə dair xəbərdarlıq elan olunmayıb.
İlkin göstəricilərə əsasən, güclü seysmik təkanlar nəticəsində hər hansı insan tələfatı, xəsarət alanlar və ya ciddi dağıntılar barədə rəsmi məlumat daxil olmayıb.
