Almaniyalı yarımmüdafiəçi Brayan Qrudanın "RB Leypsiq"dəki gələcəyi yenidən müzakirə mövzusuna çevrilib.
"Operativ Məlumat Mərkəzi-OMM" "Bild" nəşrinə istinadən xəbər verir ki, klub 21 yaşlı futbolçu üçün mövsümün son ev oyununda planlaşdırılan vida mərasimini son anda ləğv edib.
Əvvəlcə Almaniya təmsilçisi "Brayton"dan icarəyə götürdüyü oyunçu ilə yollarını ayırmağı düşünürdü.
Lakin rəhbərlik bir sıra danışıqlardan sonra planlarını dəyişmək qərarına gəlib.
Klub rəsmiləri Qrudanın mövsümün ikinci yarısındakı çıxışından razı qaldıqları üçün çempionat bitdikdən sonra İngiltərə klubu ilə yeni danışıqlara başlamaq niyyətindədirlər.
Hazırda "Brayton" futbolçunu təxminən 30 milyon avro dəyərində qiymətləndirir. Ehtimal olunan variantlar arasında satınalma hüququ və ya öhdəliyi ilə yeni icarə müqaviləsinin imzalanması da var.
Cari mövsümdə gənc yarımmüdafiəçi Almaniya klubunun heyətində 12 matça çıxaraq 3 qol və 3 məhsuldar ötürmə ilə yadda qalıb. Qeyd edək ki, istedadlı oyunçu əsas komanda istisna olmaqla, Almaniyanın bütün yaş qrupları üzrə milli komandalarında çıxış edib.
