OMM Redaksiyası
Baş Dövlət Yol Polisi İdarəsi (BDYPİ) ölkə ərazisində gözlənilən əlverişsiz hava şəraiti ilə bağlı məlumat yayıb. Milli Hidrometeorologiya Xidmətinin proqnozuna görə, mayın 25-26-da Bakı və Abşeron yarımadası ilə yanaşı, regionlarda da fasilələrlə intensiv yağış, şimşək və güclü külək müşahidə olunacaq. Bəzi ərazilərdə dolu düşməsi, yağıntının intensivləşməsi, dağlıq rayonlarda isə qar yağması ehtimalı var.
Yol polisi qeyd edir ki, hava şəraitinin pisləşməsi yol-nəqliyyat hadisələri riskini artırır. Bu səbəbdən sürücülərə aşağıdakı qaydalara əməl etmələri tövsiyə olunur:
- Hərəkət sürətini hava və yol şəraitinə uyğun seçmək;
- Ara məsafəsini saxlamaq, kəskin manevrlərdən və əsassız ötmələrdən çəkinmək;
- Görünmə məsafəsi azaldıqda işıq cihazlarından düzgün istifadə etmək.
Piyadalar və ikitəkərli nəqliyyat vasitələrinin sürücüləri üçün xüsusi xəbərdarlıq:
Piyadalar yolu yalnız müəyyən olunmuş keçidlərdən istifadə etməklə keçməli və məhdud görünmə şəraitində diqqətli olmalıdırlar. Güclü külək zamanı moped, motosiklet və skuter idarə edən şəxslərin aşma riski yüksək olduğundan, onlara hərəkəti mümkün qədər məhdudlaşdırmaları tövsiyə edilir. Unutmaq olmaz ki, məsuliyyətli davranış yol-nəqliyyat hadisələrinin qarşısını almaq üçün əsas şərtdir.
