Almaniyanın "Bavariya" heyətini yeniləmək istiqamətində addımlar atır.
"Operativ Məlumat Mərkəzi-OMM" xarici KİV-ə istinadən xəbər verir ki, klub rəhbərliyi "Ayntraxt"ın üzvü Nataniel Braun ilə transfer danışıqlarında irəliləyiş əldə edib.
Bu keçidin reallaşması komandanın sol cinahında ciddi dəyişikliklərə yol aça bilər.
İdman jurnalistləri Florian Plettenberq və Filipp Hintsenin yaydığı məlumata görə isə, yeni müdafiəçinin heyətə cəlb olunması "Bavariya"nın Alfonso Devisə olan yanaşmasını dəyişəcək. Belə ki, kanadalı futbolçu artıq klub üçün "toxunulmaz" hesab edilməyəcək.
Münxen təmsilçisi Devisi komandadan zorla göndərmək niyyətində deyil. Lakin klub rəhbərliyi futbolçu üçün daxil olacaq təklifləri dəyərləndirməyə hazırdır.
Yaxın gələcəkdə 25 yaşlı müdafiəçinin satılması ehtimalı istisna edilmir.
Qeyd edək ki, Alfonso Devisin "Bavariya" ilə müqaviləsi 2030-cu ilə qədər nəzərdə tutulub.
"Transfermarkt" portalı futbolçunun bazar dəyərini 40 milyon avro olaraq qiymətləndirir.
