Daxili İşlər Nazirliyinin Baş Narkotiklərlə Mübarizə İdarəsi tərəfindən keçirilən əməliyyat nəticəsində ölkəyə qaçaqmalçılıq yolu ilə gətirilən 43 kiloqram narkotik vasitə qanunsuz dövriyyədən çıxarılıb.
Bu barədə məlumat “Operativ Məlumat Mərkəzi-OMM”-ə nazirlikdən verilib.
Bildirilib ki, Astara və Qaradağ rayonlarında keçirilən xüsusi tədbirlər zamanı əvvəllər qəsdən adam öldürmə və oğurluq cinayətlərinə görə məhkum olunan Əli Məmmədov, Rəvan Hüseynov və İlkin Əhmədov saxlanılıblar. Baxış zamanı onlardan 43 kq 300 qram tərkibinə zərərli maddələr əlavə edilmiş marixuana aşkarlanıb.
Saxlanılan şəxslər şəxsiyyəti istintaqla araşdırılan İran vətəndaşları ilə cinayət əlaqəsinə girdiklərini etiraf ediblər. Onlar narkotikləri sərhədyanı rayonlardan qazanc əldə etmək və müxtəlif ünvanlara yerləşdirmək məqsədi ilə əldə etdiklərini bildiriblər.
Hazırda faktla bağlı cinayət işi başlanılıb və adıçəkilən şəxslər barəsində məhkəmənin qərarı ilə həbs qətimkan tədbiri seçilib.
