Bakıda avtobus zolaqlarında hərəkətin daha səmərəli təşkili və minik avtomobilləri ilə sərnişinlərin təhlükəsiz şəkildə mindirilib-düşürülməsini təmin etmək məqsədilə xüsusi yerlərin yaradılması davam etdirilir.
Azərbaycan Yerüstü Nəqliyyat Agentliyinin (AYNA) "Operativ Məlumat Mərkəzi-OMM"-ə verdiyi məlumata görə, növbəti minib-düşmə məntəqələri Səbail və Nəsimi rayonlarının ərazisində təşkil olunub.
Belə ki, Üzeyir Hacıbəyli küçəsində – Puşkin küçəsi ilə Azadlıq prospekti arasındakı hissədə, eləcə də Azadlıq prospektində, ABŞ səfirliyinin qarşısında minik avtomobilləri üçün sərnişin minib-düşmə yerləri müəyyənləşdirilib və bununla bağlı müvafiq yol nişanları quraşdırılıb.
AYNA bildirir ki, bu addımlar avtobus zolaqlarında qayda pozuntularının qarşısının alınmasına, ictimai nəqliyyatın fasiləsiz hərəkətinə və ümumi yol hərəkəti təhlükəsizliyinin artırılmasına xidmət edir.
