Şuşada keçirilən Qlobal Media Forumu çərçivəsində Azərbaycan Dövlət İnformasiya Agentliyi (AZƏRTAC) ilə üç xarici informasiya agentliyi - Bolqarıstanın BTA, Filippinin PNA, Albaniyanın ATA informasiya agentlikləri ilə əməkdaşlıq haqqında müqavilələr imzalanıb.

"Operativ Məlumat Mərkəzi-OMM" xəbər verir ki, sənədləri AZƏRTAC-ın İdarə Heyətinin sədri Vüqar Əliyev, ATA-nın baş direktoru Valbona Zhupa, BTA-nın baş direktoru Kiril Volçev, PNA-nın Xəbər və informasiya bürosu direktorunun müavini Lee Ann Pattugalan imzalayıblar.

Müqavilələr gündəlik xəbər mübadiləsi, əməkdaşların qarşılıqlı səfərlərinin təşkili və birgə informasiyaların hazırlanmasında dəstəyin göstərilməsini nəzərdə tutur.

Xatırladaq ki, AZƏRTAC və BTA agentliyi arasında əməkdaşlığa dair ilk sənəd 2004-cü ildə, ATA agentliyi ilə isə 2006-cı ildə imzalanıb. Filippinin PNA informasiya agentliyi ilə ilk dəfədir əməkdaşlıq müqaviləsi bağlanır.

"Azerspace-1" peyki vasitəsilə yayımlanan radiokanalların sayı 24-ə çatıb.

"Operativ Məlumat Mərkəzi-OMM" xəbər verir ki, bu barədə Azərbaycanın Kosmik Agentliyi (Azərkosmos) məlumat yayıb.

Bildirilib ki, "AvtoFm", "Baku Hit FM", "Retro FM" və "Yurd FM" radio dalğaları da artıq "Azerspace-1" peyki üzərindən yayımlanmağa başlayıb.

Bununla da ölkədə peyk vasitəsilə yayımlanan radiokanalların sayı 24-ə çatıb.

Avropa İttifaqı (Aİ) Şurası Avropa İttifaqının ərazisində “Voice of Europe”, “RİA Novosti”, “İzvestiya” və “Rossiyskaya qazeta”nın yayımını qadağan edib.

"Operativ Məlumat Mərkəzi-OMM" xəbər verir ki, bu barədə qurumun məlumatında qeyd edilib.

APA TV-nin rejissoru Emil Abdullayev 41 yaşında vəfat edib.

"Operativ Məlumat Mərkəzi-OMM" xəbər verir ki, mərhum xərçəng xəstəliyindən əziyyət çəkirdi.

Rejissor uzun müddət televiziya sahəsində işləyib. Son 10 ildə APA TV-nin əməkdaşı olub.

Allah rəhmət eləsin.

Medianın İnkişafı Agentliyi (MEDİA) çap mediası subyektlərinə dəstək üçün müsabiqə elan edib.

"Operativ Məlumat Mərkəzi-OMM" xəbər verir ki, bu barədə MEDİA məlumat yayıb.

Bildirilib ki, Media Reyestrinə daxil edilmiş ictimai-siyasi qəzetlər müsabiqədə iştirak edə bilərlər. Müsabiqədə iştirak etmək üçün müraciət və ona əlavə edilən sənədlər elektron formada mib.media.gov.az portalı vasitəsilə Agentliyə təqdim edilməlidir.

Müsabiqənin yekununda qalib elan edilmiş qəzet redaksiyaları ilə Agentlik arasında maliyyə yardımının göstərilməsinə dair müqavilə imzalanır və 6 (altı) ay müddətində qüvvədə olur.

Vurğulanıb ki, həftədə bir nömrəsi maliyyələşdirilən qəzetlərin hər birinə aylıq 5000 manat, həftədə beş nömrəsi maliyyələşdirilən qəzetlərin hər birinə aylıq 15000 min manat, qəzetin eyniadlı veb-saytına isə aylıq 3000 manat (əsaslı yenilənmə niyyəti ifadə edilmişdirsə, ilk ay 5000 manat olmaqla) məbləğində maliyyə yardımı göstərilir.

Qeyd edək ki, müsabiqəyə 23 may 2024-cü il tarixinədək müraciət etmək mümkündür.

Medianın İnkişafı Agentliyi (MEDİA) onlayn media subyektlərinə dəstək üçün müsabiqə elan edib.

"Operativ Məlumat Mərkəzi-OMM" xəbər verir ki, bu barədə MEDİA məlumat yayıb.

Bildirilib ki, Media Reyestrinə daxil edilmiş ictimai-siyasi və idman məzmunlu kütləvi informasiya dərc edən onlayn media subyektləri müsabiqədə iştirak edə bilərlər. Müsabiqədə iştirak etmək üçün müraciət və ona əlavə edilən sənədlər elektron formada mib.media.gov.az portalı vasitəsilə Agentliyə təqdim edilməlidir.

Vurğulanıb ki, müsabiqənin yekununda qalib elan edilmiş onlayn media subyektləri ilə Agentlik arasında həmin subyektlərin hər birinə aylıq 3000 (üç min) manat məbləğində maliyyə yardımının göstərilməsinə dair müqavilə imzalanır və 6 (altı) ay müddətində qüvvədə olur.

Qeyd edək ki, müsabiqəyə 23 may 2024-cü il tarixinədək müraciət etmək mümkündür.