OMM Redaksiyası
Azərbaycanda kənd təsərrüfatı sektoru ilə bağlı yeni qanun layihəsi hazırlanıb. Sənəd dövlət dəstəyinin gücləndirilməsi, ərzaq təhlükəsizliyinin təmin olunması, davamlı inkişafın təşviqi və sektorun iqlim dəyişikliyinə uyğunlaşmasının yaxşılaşdırılmasını nəzərdə tutur.
Layihənin məqsədi kənd təsərrüfatının dövlət tərəfindən tənzimlənməsi və dəstəklənməsi üçün hüquqi, təşkilati, sosial və iqtisadi əsaslar yaratmaqdır. Sənəddə davamlı inkişaf, ərzaq təhlükəsizliyi və kənd ərazilərinə diqqət yetirilir.
Qanun qəbul edilərsə, “Taxıl haqqında”, “Çayçılıq haqqında”, “Pambıqçılıq haqqında” və “Kənd təsərrüfatı kooperasiyası haqqında” qanunlar qüvvədən düşəcək, onların müvafiq müddəaları yeni qanuna daxil ediləcək.
Təklif olunan dəyişikliklər Mülki Məcəlləni, eləcə də “Kredit ittifaqları haqqında”, “Büdcə sistemi haqqında”, “Fitosanitar nəzarəti haqqında” və “Ekoloji təmiz kənd təsərrüfatı haqqında” qanunları əhatə edir. “Aqrar subsidiya” anlayışının “Büdcə sistemi haqqında” qanuna daxil edilməsi də nəzərdə tutulub.
Bitkiçilik və bitki sağlamlığı məsələləri yeni qanunun 4-cü fəslində tənzimlənəcək. Bununla əlaqədar “Fitosanitar nəzarəti haqqında” qanunda fitosanitar xidmətə dair bəzi müddəaların, o cümlədən müvafiq anlayışların və bütöv bir fəslin ləğvi təklif olunur. “Ekoloji təmiz kənd təsərrüfatı haqqında” qanuna isə bir sıra terminoloji dəyişikliklər ediləcək.
Kənd təsərrüfatı naziri Məcnun Məmmədov daha məhsuldar, texnoloji baxımdan inkişaf etmiş və rəqabətədavamlı aqrar sistemə ehtiyac olduğunu bildirib. Onun sözlərinə görə, davamlı inkişaf və ərzaq təhlükəsizliyi sektorun prioritetlərindəndir.
2026-cı il mayın 25-də təsdiqlənən 2026–2030-cu illər üçün kənd təsərrüfatı, balıqçılıq və akvakultura məhsullarının istehsalı və emalının inkişafı üzrə Dövlət Proqramında aqrar sektorun davamlı inkişafı, eləcə də intensiv və rəqabətədavamlı istehsal modelinə sürətli keçid əsas prioritetlər kimi müəyyən edilib.
