Azərbaycanın xarici işlər naziri Ceyhun Bayramov ilə Pakistanın baş nazirinin müavini və xarici işlər naziri Məhəmməd İshaq Dar arasında baş tutan son telefon danışığında regiondakı təhlükəsizlik vəziyyəti və qlobal sülh təşəbbüsləri diqqət mərkəzində olub.
Azərbaycan və Pakistan XİN rəhbərləri regiondakı təhlükəsizliyi necə qiymətləndirir?
“Operativ Məlumat Mərkəzi-OMM” xəbər verir ki, bu barədə rəsmi məlumatı Xarici İşlər Nazirliyi (XİN) yayıb. Qeyd olunub ki, telefon danışığı zamanı tərəflər regionda mövcud təhlükəsizlik vəziyyətini ətraflı şəkildə müzakirə ediblər.
ABŞ-İran atəşkəsi və İslamabad danışıqlarından nələr gözlənilir?
Ceyhun Bayramov ABŞ ilə İran arasında əldə olunmuş atəşkəsi alqışlayaraq, bunun gərginliyin azaldılması, sabitliyin möhkəmləndirilməsi və humanitar vəziyyətin yaxşılaşdırılması baxımından mühüm addım olduğunu vurğulayıb.
Dost və qardaş Pakistan tərəfinin atəşkəsin əldə olunması istiqamətində oynadığı mühüm rol xüsusilə təqdir olunub. Pakistana bölgədə sülh və sabitliyin təşviqi, tərəflər arasında dialoqun qurulması və etimadın möhkəmləndirilməsi istiqamətində göstərdiyi səylərdə, habelə qarşıdan gələn İslamabad danışıqlarında uğurlar arzulanıb.
Azərbaycan-Pakistan tərəfdaşlığının gələcək inkişaf perspektivləri
İslamabad danışıqlarının müsbət nəticələnəcəyinə ümid ifadə edən Ceyhun Bayramov, Pakistanın ardıcıl və prinsipial mövqeyini, habelə konstruktiv təşəbbüslərini yüksək qiymətləndirib.
Sonda nazirlər qarşılıqlı maraq doğuran digər regional və beynəlxalq məsələlər ətrafında fikir mübadiləsi aparıb və Azərbaycan-Pakistan tərəfdaşlığının inkişaf perspektivlərini müzakirə ediblər.
