Milli Məclis elektron siqaretlərin istifadəsi, idxalı, istehsalı və satışı ilə əlaqədar yeni cərimələri rəsmən qəbul edib.
“Operativ Məlumat Mərkəzi-OMM” xəbər verir ki, bununla bağlı İnzibati Xətalar Məcəlləsinə edilən dəyişikliklər parlamentin plenar iclasında müzakirə olunaraq təsdiqlənib.
Sənədə əsasən, qadağan edilmiş yerlərdə və küçələrdə elektron siqaretlərin istifadəsinə görə 30 manat məbləğində cərimə tətbiq ediləcək.
Bundan əlavə, elektron siqaretlərin və onların komponentlərinin qanunsuz dövriyyəsinə (idxalı, ixracı, istehsalı, satışı və saxlanılması) görə mallar müsadirə edilməklə sərt cərimələr nəzərdə tutulur.
Qaydanı pozan fiziki şəxslər 350 manatdan 500 manatadək, vəzifəli şəxslər 1650 manatdan 2200 manatadək cərimə olunacaqlar.
Hüquqi şəxslər üçün isə bu məbləğ 4 min manatdan 5 min manatadək təşkil edəcək.
Qanunun aprelin 1-dən qüvvəyə minməsi nəzərdə tutulur. Layihə üçüncü oxunuşda səsverməyə qoyularaq qəbul edilib.
