İsveç Böyük Britaniyanın Liverpul şəhərində keçirilən “Avroviziya” mahnı müsabiqəsinin qalibi olub.

"Operativ Məlumat Mərkəzi-OMM" xəbər verir ki, İsveçi məşhur ifaçı Lorin “Tattoo” mahnısı ilə təmsil edib.

Tamaşaçılar və münsiflər heyəti Skandinaviya nümayəndəsinə ümumilikdə 583 bal veriblər.

Beləliklə, İsveç artıq 7-ci dəfə Avropanın əsas mahnı müsabiqəsinin qalibi olub. Lorin isə müsabiqədə iki dəfə qalib gələn ilk qadın olub. Daha öncə o, 2012-ci ildə Bakıda keçirilən müsabiqədə birinci olmuşdu. 

Azərbaycanlı tamaşaçılar Estoniyaya 1, Ukraynaya 2, Finlandiyaya 3, İsveçrəyə 4, Avstraliyaya 5, İtaliyaya 6, İspaniyaya 7, Albaniyaya 8, İsveçə 10 xal veriblər. Maksimum olan 12 xalı isə İsrail təmsilçisinə layiq görüblər. Azərbaycanın ballarını İctimai TV-nin aparıcısı Nərmin Salmanova elan edib.

Xatırladaq ki, Azərbaycanı “Avroviziya” mahnı müsabiqəsində Tural və Turan Bağmanov qardaşları “Tell me more” mahnısı ilə təmsil edib, lakin onlar yarışmanı yarımfinalda başa vurublar.

Qeyd edək ki, Azərbaycanda müsabiqəni İctimai TV yayımlayıb.

Ermənistan və Azərbaycan arasında davamlı sülhü təmin etmək üçün imkanlar mövcuddur.

"Operativ Məlumat Mərkəzi-OMM" xəbər verir ki, bu barədə Avropa İttifaqının (Aİ) Cənubi Qafqaz üzrə xüsusi nümayəndəsi Toyvo Klaarın sözçüsü məlumat verib.

Bildirilib ki, Aİ İrəvanın Bakıya göndərdiyi son təkliflər də daxil olmaqla tərəflər arasında məsələ ilə bağlı layihə mətnlərinin davamlı mübadiləsini müsbət qiymətləndirir:

“Biz hər iki tərəflə daimi təmasdayıq. İnanırıq ki, tərəflər arasında, xüsusən də Prezident Mişel tərəfindən ən yüksək səviyyədə dəstəklənən, bir neçə il davam edən danışıqlar və müzakirələrdən sonra Ermənistan və Azərbaycan arasında davamlı sülhü təmin etmək üçün elementlər mövcuddur”.

Xüsusi nümayəndənin yaxın dövrdə Azərbaycan və Ermənistana səfər edib-etməyəcəyinə gəldikdə isə diqqətə çatdırılıb ki, Toyvo Klaar tez-tez regiona səfər edir, normallaşma prosesini və sülh gündəmini irəli aparmaq üçün bundan sonra da səfərləri davam etdirəcək.

Qeyd edək ki, Toyvo Klaar aprelin 10-u Brüsseldə “Azadlıq Radiosu”nun erməni xidmətinə müsahibə verib və müsahibə zamanı Azərbaycan-Ermənistan münasibətlərinin normallaşmasının çox vaxt almayacağını düşündüyümü deyib. Aİ-nin Cənubi Qafqaz üzrə xüsusi nümayəndəsi regionda normallaşma prosesini dəstəklədiyini və bunun üçün Bakı və İrəvanla birgə işləmək istədiklərini vurğulayıb.

Ermənistan tərəfinin guya Azərbaycanın üçtərəfli bəyanatı pozduğu iddiasının heç bir əsası yoxdur.

"Operativ Məlumat Mərkəzi-OMM" xəbər verir ki, bunu Azərbaycan Xarici İşlər Nazirliyinin mətbuat katibi Ayxan Hacızadə N.Paşinyanın Münxendə erməni icması ilə görüşdə səsləndirdiyi fikirləri şərh edərkən deyib.

"Ermənistan tərəfinin guya Azərbaycanın üçtərəfli bəyanatı pozduğu iddiasına gəldikdə bunun heç bir əsası yoxdur, məhz Ermənistan öhdəliklərinə zidd olaraq silahlı qüvvələrini Azərbaycan ərazisindən çıxarmadığı, kommunikasiya xəttlərinin açılması öhdəliyini yerinə yetirmədiyi hər kəsə yaxşı məlumdur", - XİN sözçüsü bildirib

A.Hacızadə qeyd edib ki, Ermənistan tərəfi anlamalıdır ki, bölgədə sülh və sabitliyin təminatının yolu ərazi bütövlüyünün və suverenliyin təsdiq olunması və hörmət edilməsi əsasında qonşu ölkələrlə münasibətlərin qurulmasından və sülhün bərqərar olunması üçün Azərbaycanla birbaşa konstruktiv danışıqlardan keçir.

1970-ci illərin Meksika kinosunun önəmli adlarından olan Saşa Monteneqro fevralın 14-nə keçən gecə insult keçirib və daha sonra 78 yaşında dünyasını dəyişib.

"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.

Monteneqronun bir müddətdir ağciyər xərçəngi ilə mübarizə apardığı və bu xərçəngin onun iflic olmasına səbəb olduğu öyrənilib.

Meksikanın keçmiş prezidenti Xose Lopez Portillonun həyat yoldaşı Saşa Monteqronun Morelosun Cuernavaca şəhərindəki evində dünyasını dəyişdiyi açıqlanıb.

Taylandda "Bi-2" qrupunun üzvləri saxlanılıb. 

"Operativ Məlumat Mərkəzi-OMM" xəbər verir ki, bu barədə TASS məlumat yayıb.

Buna səbəb rokçuların iş icazəsi olmadan Pattaya və Phuket əyalətlərində konsert vermələri olub.

Bundan əvvəl komediya ustası Ruslan Belinin (Rusiya Federasiyasında xarici agent kimi tanınır) Tailanddakı konsertləri ləğv edilmişdi.

Taylandda komediya ustası Maksim Qalkinin (Rusiya Federasiyasında xarici agent kimi tanınan) çıxışı da təşkilatçıların tələbi ilə ləğv edilib. Rusiya Federasiyasının Tailanddakı səfirliyi şoumen Maksim Qalkinin konsertlərinin ləğvi ilə heç bir əlaqəsinin olmadığını bildirib.

ABŞ-nin Azərbaycandakı səfiri Mark Libbi (Mark Libby) 20 Yanvar faciəsinin 34-cü ildönümü ilə əlaqədar Azərbaycana başsağlığı verib.

"Operativ Məlumat Mərkəzi-OMM"-in xəbərinə görə, bu barədə səfirliyin "X" hesabında paylaşım edilib.

"Bu gün biz Qara Yanvar faciəsində həlak olanların xatirəsini ehtiramla yad edirik. Bu faciəli gündə yaxınlarını itirənlərin ailə üzvlərinə və dostlarına dərin hüzünlə başsağlığı veririk", - səfir bildirib.