“Azərbaycanla sülh müqaviləsində Qərb və ya Rusiya variantından söhbət getmir. Ermənistan və Azərbaycan birbaşa olaraq məsələləri müzakirə edirlər”.

"Operativ Məlumat Mərkəzi-OMM" xəbər verir ki, bunu Ermənistanın xarici işlər naziri Ararat Mirzoyan parlamentin iclasında deyib.

O bildirib ki, sənəd Bakı ilə İrəvan arasında imzalanacaq.

Nazirin sözlərinə görə, tərəflər bir sıra məsələlərdə ideal olmasa da, məqbul həll yolunu tapıblar.

Ermənistanla Azərbaycan arasında sülh sazişinin imzalanması regionun digər ölkələrinə də fayda gətirəcək.

"Operativ Məlumat Mərkəzi-OMM"  yerli KİV-ə istinadən xəbər verir ki, bu barədə Ermənistanın baş naziri Nikol Paşinyan bildirib.

"Əminəm ki, sülhün benefisiarları təkcə Ermənistan və Azərbaycan deyil, Gürcüstan, Türkiyə və İran da ondan bərabər şəkildə faydalanacaq", - o vurğulayıb.

Baş nazirin sözlərinə görə, Cənubi Qafqazda həqiqətən də münaqişə səhifəsini bağlamaq və regionda davamlı sülhün bərqərar olması üçün tarixi imkan var.

N.Paşinyan qeyd edib ki, Ermənistan və Azərbaycan sülh sazişinin təxminən 80 %-ni razılaşdıra biliblər:

“Biz Azərbaycanı sənəd layihəsinin razılaşdırılmış müddəalarını imzalamağa, diplomatik əlaqələr qurmağa və yaxın vaxtlarda müzakirələri davam etdirməyi təklif etdik”.

Ermənistanın Baş naziri Nikol Paşinyan ABŞ-nin dövlət katibi Antoni Blinkenlə İrəvan və Bakı arasındakı sülh prosesini müzakirə edib.

"Operativ Məlumat Mərkəzi-OMM" xəbər verir ki, bu barədə Ermənistan Baş nazirinin ofisi məlumat yayıb.

Bildirilib ki, Nikol Paşinyanla Antoni Blinken arasında telefon danışığı olub. Söhbət zamanı Ermənistan və Azərbaycan arasında sülh prosesi ilə bağlı məsələlər, o cümlədən Ermənistan – ABŞ ikitərəfli gündəliyi müzakirə edilib.

Ermənistan ikitərəfli əməkdaşlıq zamanı Qərb dövlətləri tərəfindən aldadılacaq.

"Operativ Məlumat Mərkəzi-OMM" BELTA-ya istinadən xəbər verir ki, bunu Belarus prezidenti Aleksandr Lukaşenko deyib.

Lukaşenko əlavə edib ki, Qərbə etibar etmək olmaz.

Avqustda Lukaşenko demişdi ki, Qərbdə Ermənistan heç kimə lazım deyil.

Bundan sonra Belarusun Ermənistandakı səfirliyinə pomidor atılıb. Buna cavab olaraq Ermənistanın Belarusdakı müvəqqəti işlər vəkili aksiyanın qarşısını almaq üçün tədbirlər görülmədiyi üçün respublikanın Xarici İşlər Nazirliyinə çağırılıb.

İyun ayında Ermənistanın baş naziri Nikol Paşinyan Belarusa səfər etməkdən imtina edib.

Ermənistanda "Qərbi Nil" virusundan ölənlərin sayı 3 nəfərə çatıb.

"Operativ Məlumat Mərkəzi-OMM" "Sputnik Armenia"ya istinadən xəbər verir ki, bu barədə Ermənistan Səhiyyə Nazirliyi məlumat yayıb.

“Vəfat edən xəstələrin hər ikisinin yaşı 80-dən yuxarı olub”, - deyə Səhiyyə Nazirliyindən bildirilib.

Bundan əvvəl Ermənistan mətbuatı ölkənin Armavir vilayətində 3 nəfərin bu xəstəlikdən öldüyü barədə məlumat yayıb.

Səhiyyə Nazirliyinin son məlumatına görə, ölkədə "Qərbi Nil" qızdırmasına ümumilikdə 108 yoluxma halı qeydə alınıb.

İrəvan sülh sazişi layihəsini Bakıya verib, Ermənistan Azərbaycanın reaksiyasını gözləyir.

"Operativ Məlumat Mərkəzi-OMM" xəbər verir ki, bu barədə Ermənistanın xarici işlər naziri Ararat Mirzoyan mətbuat konfransında bildirib.

“Ermənistan sülh müqaviləsinin onuncu variantını Azərbaycana təhvil verib. Layihəyə bütün razılaşdırılmış mətn, tam razılaşdırılmış maddələr və maddələrin razılaşdırılmış hissələri daxildir”.

Mirzoyanın sözlərinə görə, Ermənistan və Azərbaycanın tezliklə sülh sazişi imzalamaq üçün real şansları var.

"Biz inanırıq ki, qısa müddətdə sülh sazişi imzalamaq və Cənubi Qafqazda uzunmüddətli sabitliyə qapı açmaq üçün real imkan var", - o qeyd edib.