ABŞ Yaxın Şərqdəki ölkəyə kömək etmək üçün Kiprdəki Britaniya bazasından istifadə edib

Britaniya Müdafiə Nazirliyi Amerika təyyarələrinin Britaniyanın Kiprdəki Akrotiri hərbi bazasının hava limanına daxil olduğunu təsdiqləyib, lakin aviasiya səfərlərinin məqsədləri barədə məlumat verməyib.

"Operativ Məlumat Mərkəzi-OMM" xəbər verir ki, bu barədə Kiprin “Cyprus Post” qəzeti Böyük Britaniyanın Müdafiə Nazirliyinə istinadən məlumat yayıb.

Qəzza zolağında baş verən münaqişə zamanı ABŞ təyyarələrinin İsrailə silah və sursat daşımaq üçün krallığın Kiprdəki bazalarından istifadə etməsi barədə mətbuatda məlumat yayıldıqdan sonra nəşrin jurnalistləri Britaniya müdafiə nazirliyi ilə əlaqə saxlayıblar.

Məqalə müəlliflərinin yazdığı kimi, Böyük Britaniya Müdafiə Nazirliyinin rəsmi nümayəndəsi Amerika hərbi təyyarələrinin Böyük Britaniyanın icazəsi ilə suveren baza ərazisinə eniş etdiyini təsdiqləyib, lakin bu uçuşların məqsədi ilə bağlı şərh verməyib.

Buna cavab olaraq Kipr Respublikası hökumətinin rəsmi nümayəndəsi Konstantinos Letimpiotis bildirib ki, hökumət üçüncü ölkələrin əməliyyatlarını şərh edə bilməz. O, Kiprin heç bir hərbi əməliyyatda iştirak etmədiyini də vurğulayıb.