Kiprin Yunan administrasiyasının NATO-ya daxil olmaq planları “qəbuledilməzdir və regiondakı kövrək tarazlığı poza bilər”.
"Operativ Məlumat Mərkəzi-OMM" xəbər verir ki, bu barədə jurnalistlərə Türkiyənin Müdafiə Nazirliyindəki mənbə Kipr prezidenti Nikos Xristodoulidisin açıqlamalarını şərh edərkən bildirib.
Xristodoulidis bundan əvvəl Kiprin ən qısa zamanda NATO-ya üzv olmaq niyyətini açıqlamışdı. O, həmçinin qeyd edib ki, ölkə silahlı qüvvələrinin müasirləşdirilməsi və müttəfiqlik standartlarına uyğunlaşdırılması üçün bütün mövcud resurslardan istifadə edir.
Türkiyə Müdafiə Nazirliyindəki mənbə vurğulayıb ki, NATO-nun genişləndirilməsi qərarı bütün üzv ölkələrin milli maraqları nəzərə alınmaqla yekdilliklə qəbul edilir.
“Bu mərhələdə Cənubi Kipr Rum Administrasiyasının NATO-ya üzv olmaq üçün müraciəti Türkiyə üçün qəbuledilməz bir addımdır. Bu proses kövrək tarazlıqları pozacaq və Kipr probleminin həlli üçün aparılan danışıqlara mənfi təsir göstərəcək”,- deyə Müdafiə Nazirliyi qeyd edib.
