Qəzza zolağına ərzaq tədarükü yaxın həftələrdə əhəmiyyətli dərəcədə artırılmazsa, bölgədə bütün əhali aclığa məruz qala bilər.
"Operativ Məlumat Mərkəzi-OMM" xəbər verir ki, bu barədə BMT-nin Ümumdünya Ərzaq Proqramının icraçı direktorunun müavini Karl Skau Kanadanın CBC telekanalına açıqlamasında bildirib.
Onun sözlərinə görə, hazırda Qəzzaya gündə orta hesabla 100-dən az ərzaq daşıyan yük maşını daxil olur. Halbuki, fevral və mart aylarında atəşkəs dövründə gündəlik 600-700 yük maşını ərzaq çatdırılırdı.
“2,2 milyon insan üçün bu, vedrədə bir damladır. Əgər vəziyyət daha bir neçə həftə davam edərsə, bütün Qəzza əhalisi aclıqdan əziyyət çəkəcək”, – Skau qeyd edib.
Xatırladaq ki, sentyabrın ortalarında BMT-nin Ərzaq və Kənd Təsərrüfatı Təşkilatı təxminən 1,4 milyon insanın – əsasən Qəzza və Sudanda – fəlakətli qida təhlükəsizliyi ilə üzləşdiyini açıqlamışdı.
