Macarıstan Aİ liderlərinin Ukraynaya hərbi dəstəyi davam etdirmək səylərini məsuliyyətsizlik hesab edir, çünki Aİ ölkələrinin buna pulu yoxdur.
"Operativ Məlumat Mərkəzi-OMM" xəbər verir ki, bu ifadələri Macarıstanın Baş naziri Viktor Orban "Kossuth" radiosunun səhər proqramında çıxışında bildirib.
O, Macarıstanın Aİ-nin digər 26 ölkəsindən fərqli olaraq, cümə axşamı Brüssel sammitində Ukrayna ilə bağlı birgə bəyanatı təsdiqləməkdən niyə imtina etdiyini izah edib. Bunun əsas səbəbi Macarıstanın münaqişənin sülh yolu ilə həlli tərəfdarı olan mövqeyinə zidd olmasıdır. Bundan əlavə, Macarıstan hesab edir ki, problem döyüş meydanında həll edilə bilməz və Ukrayna bu vəziyyətdən qalib çıxa bilməz.
"Müharibə üç ildir davam edirsə və Rusiya qalib gəlirsə və ABŞ kənara çəkilirsə, o zaman yerdə qalan ölkələrin şansları nə qədərdir? 26 ölkənin bu bəyanatı qəbul etmək üçün heç bir əsası yox idi. Əgər onlar müharibəni davam etdirmək qərarına gəlsələr, o zaman bizim bütün son pulumuz buna xərclənəcək", - hökumət başçısı bildirib.
