Avropa İttifaqının xarici işlər və təhlükəsizlik siyasəti üzrə ali nümayəndəsi Kaya Kallas Rusiya və Qəzza ilə bağlı mövqeyi, eləcə də həmkarları ilə münasibətlərinə görə Brüsseldə artan tənqidlərə məruz qalır.
"Operativ Məlumat Mərkəzi-OMM" xəbər verir ki, bu barədə "Politico" nəşri məlumat yayıb.
Nəşrin məlumatına görə, Kallasın fəaliyyətindən Avropa Komissiyasındakı bir neçə həmkarı və Brüsselin siyasi dairələrinin nümayəndələri narazıdır.
O, xüsusilə Avropa Şurasının prezidenti Antonio Kosta ilə gərgin münasibətlər qurmaqda ittiham olunur.
"Politico" yazır ki, Kallas Rusiyaya qarşı sərt mövqeyinə görə bəzən “həddindən artıq irəli getməkdə” günahlandırılır. Onun İsrail-Fələstin münaqişəsi ilə bağlı mövqeyi isə Qəzza böhranında “İsraili məsuliyyət daşımayan tərəf kimi göstərmədiyi” üçün səmərəsiz hesab olunub.
