Əfqanıstanın qonşu ölkələrinin Rusiyanın iştirakı ilə xüsusi nümayəndələr səviyyəsində ikinci görüşü gələn ilin mart ayında Pakistanın paytaxtı İslamabadda keçiriləcək.
"Operativ Məlumat Mərkəzi-OMM" xəbər verir ki, bu barədə İran Xarici İşlər Nazirliyi açıqlamada bildirib.
Bəyanatda qeyd olunur ki, iştirakçılar Pakistanın 2026-cı ilin mart ayında İslamabadda Əfqanıstanın qonşu ölkələrinin xüsusi nümayəndələrinin görüşünün ikinci mərhələsinə ev sahibliyi etməyə hazır olmasını müsbət qarşılayıblar.
Xatırladaq ki, Əfqanıstan üzrə Pakistan, Tacikistan, Özbəkistan, Türkmənistan, Çin və İranın xüsusi nümayəndələrinin ilk görüşü dekabrın 14-də Tehranda İranın təşəbbüsü ilə keçirilib.
Görüşdə Rusiya Prezidentinin Əfqanıstan üzrə xüsusi nümayəndəsi Zamir Kabulov da Rusiya tərəfdən iştirak edib.
