“Azərbaycan və İran arasında keçirilən hərbi təlimlərin İsraillə İran arasındakı münasibətə heç bir aidiyyatı yoxdur”.
Bu sözləri hərbi ekspert Ədalət Verdiyev "Operativ Məlumat Mərkəzi-OMM"-ə açıqlamasında bildirib.
Onun sözlərinə görə, hər iki qonşu ölkənin bir çox məsələlərdə, o cümlədən axtarış və xilasetmədə birgə iştirak edəcəyi bu təlimlər Azərbaycan və İran arasında hərbi əməkdaşlığın gücləndirilməsi və dənizdə keçirilən əməliyyat imkanlarının artırılmasından ibarətdir:
“Bu təlimlərin keçirilməsi barədə razılıq Müdafiə Nazirliyi ilə İran silahlı qüvvələrinin Baş Qərərgahı arasında imzalanan hərbi və hərbi-texniki əməkdaşlığa dair birgə kommissiyanın iclas protokoluna əsaslanır. Bu təlimlər heç bir kənar ölkəyə və ya üçüncü bir tərəfə qarşı yönəlməyib. Bu təlimlərdə Azərbaycan tərəfindən 100-dən çox canlı qüvvə və iki əməliyyat gəmimiz iştirak edir”.
Ekspert deyib ki, bu təlimlərdə dənizdə qəza vəziyyətində olan gəmilərə, insanlara kömək məqsədi daşıyır. Bu təlimlərdə axtarış-xilasetmə fəaliyyətlərinin birgə həyata keçməsi planlaşdırılıb: “Təlimlər hər iki ölkənin xilasetmə qüvvələrinin fövqəladı halların və onların nəticələrinin qarşısının alınmasında və aradan qaldırılmasında mühüm rol oynayacaq”.
