İran Xarici İşlər Nazirliyinin sözçüsü İsmayıl Bəqayi 2015-ci il nüvə razılaşmasının Avropa tərəflərinin Tehrana qarşı Birləşmiş Millətlər Təşkilatının (BMT) sanksiyalarını bərpa etmək üçün nəzərdə tutulan “təhrik mexanizmi"ni (snapback) işə salmaq hüququna malik olmadığını bildirib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Böyük Britaniya, Fransa və Almaniyanın, İranın razılaşmanı pozduğunu əsas gətirərək BMT sanksiyalarını bərpa etməyə imkan verən mexanizmi tətbiq etməklə hədələməsini şərh edən Bəkayi bildirib:
“Avropa tərəflərinin bu mexanizmdən istifadə etməsi üçün nə hüquqi, nə də mənəvi əsasları var”.
Sözçü bu mexanizmin işə salınmasının mümkün nəticələrindən narahat olduqlarını bildirib və əlavə edib:
“Əgər Avropa tərəfləri nüvə razılaşmasındakı öhdəliklərini yerinə yetirsəydilər, bu cür vəziyyətlərlə qarşılaşmazdıq və İran da öz öhdəliklərini azaltmaq hüququndan istifadə etməzdi”.
Bəqayi həmçinin qeyd edib ki, bu məsələni ölkə vətəndaşlarının düşüncə və psixoloji durumuna təsir edən bir təzyiq vasitəsinə çevrilməsinə yol verməyəcəklər.
