"Sahil Mühafizəsi Şimali Atlantikada Rusiya bayrağı altında üzən Marinera tankerini ələ keçirdikdən sonra ABŞ Ədliyyə Nazirliyi bir neçə başqa gəmini izləyir".
"Operativ Məlumat Mərkəzi-OMM" xəbər verir ki, bu sözləri ABŞ Baş prokuroru Pam Bondi deyib.
"Ədliyyə Nazirliyi oxşar tədbirlər üçün bir neçə digər gəmini də izləyir. Sahil Mühafizəsinin və ya digər federal rəsmilərin əmrlərinə tabe olmayan istənilən gəminin heyət üzvü qanunun bütün sərtliyi ilə məsuliyyət daşıyacaq", - Bondi qeyd edib.
O, həmçinin Marinera tankerinin heyətinə qarşı "Sahil Mühafizəsinin əmrlərinə tabe olmama" ittihamı ilə istintaq başlandığını və cinayət ittihamlarının gözlənildiyini də aydınlaşdırdı.
Qeyd edək ki, Rusiya bayrağı altında üzən "Marinera" tankeri yanvarın 7-də Şimali Atlantikada ABŞ Sahil Mühafizəsi tərəfindən saxlanılıb.
