Dünya Çempionatının başlaması ilə ABŞ hökumətinin tətbiq etdiyi miqrasiya və viza qaydaları gözlənilməz bir böhrana səbəb olub.
"Operativ Məlumat Mərkəzi-OMM" xəbər verir ki, Afrika Futbol Konfederasiyası tərəfindən turnirə təyin olunan və 2025-ci ilin ən yaxşı kişi hakimi seçilən somalili Omar Abdulkadir Artan ABŞ-yə buraxılmayıb.
ABŞ rəsmiləri bu qərarı "təhlükəsizlik yoxlamaları ilə bağlı narahatlıqlar"la əsaslandırıb. FIFA rəsmiləri isə viza məsələlərində son qərarın ev sahibi ölkənin səlahiyyətində olduğunu vurğulayıb. Hakim Artan isə vəziyyəti anlayışla qarşılayaraq, həmkarlarına uğurlar arzulayıb.
Viza problemləri yalnız hakimlərlə məhdudlaşmır.
İrlandiya milli komandasının girişində təhlükəsizlik tədbirləri gücləndirilib, çoxsaylı şotlandiyalı azarkeşin isə səyahət icazələri son anda ləğv edilib. İngiltərə millisinin keçmiş futbolçusu Ian Wright yaşanan bu xaotik vəziyyəti "Xaosun Dünya Çempionatı" adlandırıb.
Bundan əlavə, İran Futbol Federasiyası turnirin açılışından bir həftə əvvəl bilet kvotalarının ləğv edildiyini açıqlayıb. Bu qərar, rəsmi prosedurlara güvənərək səyahət planı quran minlərlə iranlı azarkeşi çətin vəziyyətdə qoyub.
