Ağ Evdə İran siyasəti ilə bağlı fikir ayrılığı yaranıb.
“Operativ Məlumat Mərkəzi-OMM” xəbər verir ki, bu barədə "The Independent" qəzeti məlumat yayıb.
Məlumata görə, ABŞ Prezidenti Donald Trampın İranla bağlı siyasəti Ağ Evdə yüksək vəzifəli rəsmilər arasında fikir ayrılığına səbəb olub. İddia edilir ki, ötən həftə prezidentlə milli təhlükəsizlik komandasının üzvləri arasında İranla mümkün qarşıdurmanın idarə olunması və İsraillə koordinasiya məsələlərinə dair ciddi müzakirələr aparılıb.
Ağ Ev rəsmiləri isə bu iddiaları təkzib edərək, administrasiyanın normal fəaliyyət göstərdiyini və prezidentin hər hansı gərgin vəziyyət yaşamadığını bildiriblər.
Qeyd olunur ki, hazırda administrasiya daxilində iki fərqli yanaşma mövcuddur. Bir qrup İranla diplomatik kanalların açıq saxlanılmasını müdafiə etdiyi halda, digər qrup Tehrana qarşı hərbi və iqtisadi təzyiqin maksimum səviyyəyə çatdırılmasının tərəfdarıdır. Bildirilir ki, Donald Tramp hər iki variantı nəzərdən keçirsə də, yekun qərarla bağlı müşavirlərinin fərqli mövqeləri arasında balans yaratmağa çalışır.
"Reuters"in məlumatına görə, Tramp və İsrailin Baş naziri Binyamin Netanyahu arasında keçirilən son görüşdə İrana qarşı mümkün addımlar, o cümlədən diplomatik təşəbbüslər, iqtisadi sanksiyalar və hərbi ssenarilər müzakirə olunub. İsrailli yüksək vəzifəli rəsmilərdən biri Netanyahunun yeni hücum tələb etmədiyini, lakin alternativ strateji təkliflər irəli sürdüyünü bildirib.
"Axios" portalının yazdığına görə isə Netanyahu diplomatik həll yollarına skeptik yanaşır və İrana qarşı iqtisadi-hərbi təzyiqin artırılmasını dəstəkləyir. Donald Trampın isə mümkün hərbi eskalasiyanın qlobal enerji bazarlarına təsirini nəzərə alaraq daha ehtiyatlı mövqe tutduğu bildirilir. ABŞ-nin müdafiə naziri Pete Hegsethin isə zərurət yaranacağı halda hərbi gücdən istifadənin mümkünlüyünü müdafiə etdiyi qeyd olunur.
Ekspertlərin fikrincə, Vaşinqtonda aparılan müzakirələr İranın nüvə proqramı ilə bağlı diplomatik kanalların qorunması ilə İsrailin təhlükəsizlik narahatlıqları arasında balansın tapılmasına yönəlib. Bununla yanaşı, tərəflər arasında etimad böhranının davam etdiyi vurğulanır.
