Türkiyə xarici işlər naziri Hakan Fidan Avstriyaya rəsmi səfər edəcək.
"Operativ Məlumat Mərkəzi-OMM" xəbər verir ki, bununla bağlı Türkiyə KİV məlumat yayıb.
Bildirilib ki, Fidanın səfəri 29-30 aprel tarixlərində baş tutacaq.
Hakan Fidan səfər çərçivəsində Avstriyanın Federal Avropa və Beynəlxalq İşlər naziri Beate Meinl-Reisinger ilə görüşəcək.
Səfər çərçivəsində Fidanın Avstriyanın baş naziri Christian Stocker tərəfindən qəbul edilməsi, ATƏT-in baş katibi Feridun Sinirlioğlu ilə görüşməsi, Vyana Diplomatiya Akademiyasında keçiriləcək konfransda çıxış etməsi və türk qeyri-hökumət təşkilatlarının nümayəndələri ilə bir araya gəlməsi planlaşdırılır.
Fidanın səfər çərçivəsində avstriyalı rəsmilərlə keçirəcəyi görüşlərdə Türkiyə ilə Avstriya arasındakı ikitərəfli münasibətləri siyasi, iqtisadi, ticarət, hərbi, mədəni və humanitar aspektləri ilə hərtərəfli şəkildə müzakirə etməsi və mövcud əməkdaşlıq sahələrinin daha da dərinləşdirilməsi imkanlarını dəyərləndirməsi, iki ölkə arasında ticarət və iqtisadi əlaqələrin şaxələndirilməsi, ticarət həcminin artırılması və qarşılıqlı investisiyaların təşviqi üçün mövcud potensial və imkanlara diqqət çəkməsi gözlənilir.
Bununla yanaşı, Avstriya ilə enerji, rəqəmsallaşma, əlaqələndirmə və müdafiə sənayesi başda olmaqla strateji sahələrdə əməkdaşlıq potensialını vurğulaması və bu istiqamətdə imkanları ətraflı müzakirə etməsi nəzərdə tutulur.
