Prezident İlham Əliyev Vətən müharibəsində qazanılan tarixi Zəfərdən sonra 28 May - Müstəqillik Gününü işğaldan azad edilmiş torpaqlarda qeyd etdiyini və bunun artıq bir ənənəyə çevrildiyini bildirib.
Şuşanın Böyük Qaladərəsi kəndində yerli sakinlərlə görüşən dövlət başçısı qeyd edib ki, bu addım ən düzgün seçimdir: "Müstəqillik Günü bayramını azad edilmiş torpaqlarda qeyd edirəm və bu, artıq bir ənənəyə çevrilib. Hesab edirəm ki, ən düzgün seçimdir".
Prezident çıxışı zamanı Müstəqillik Gününün hər kəs üçün xüsusi əhəmiyyət daşıdığını vurğulayaraq, tarixi proseslərə də toxunub:
- 1918-ci ildə əldə edilən müstəqillik cəmi iki il davam edib.
- Həmin dövrdə müstəqilliyi qorumaq mümkün olmayıb və o, əldən verilib.
- Bundan sonra Azərbaycan 70 il müstəqil dövlət kimi fəaliyyət göstərməyib.
