Afət Ziyadqızı
Birləşmiş Ərəb Əmirlikləri İsrailin baş naziri Binyamin Netanyahunu HƏMAS-ın 7 oktyabr 2023-cü ildə planlaşdırdığı hücum barədə əvvəlcədən xəbərdar edib.
“Operativ Məlumat Mərkəzi-OMM” xəbər verir ki, bu barədə “Haaretz” qəzeti məlumat yayıb.
Nəşrin məlumatına görə, BƏƏ prezidenti Məhəmməd bin Zayed Əl Nəhyan hücumdan təxminən 10 gün əvvəl Netanyahuya zəng edərək HƏMAS lideri Yəhya Sinvarın planlarının İsrail və Fələstin hüdudlarından kənarda ciddi nəticələrə səbəb ola biləcəyini və bütün Yaxın Şərqi sabitsizləşdirə biləcəyini bildirib.
Telefon danışığında BƏƏ lideri ilə yanaşı, onun yaxın məsləhətçisi də iştirak edib. Qəzzadan uzun illər əvvəl Əbu-Dabiyə köçmüş fələstinli məsləhətçinin anklavda əlaqələrini qoruduğu qeyd olunub.
Mənbənin iddiasına görə, Əl Nəhyan Netanyahunun reaksiyasına təəccüblənib. İsrailin baş naziri isə sakit şəkildə İsrailin istənilən ssenariyə hazır olduğunu bildirib.
Nəşrlə danışan mənbənin sözlərinə görə, BƏƏ Prezidenti Netanyahunun xəbərdarlığı ciddi qəbul edəcəyinə və müvafiq tədbirlər görəcəyinə ümid edib. Lakin İsrailin baş naziri aldığı məlumatı müdafiə qurumlarının rəhbərlərindən gizlədib.
Bildirilir ki, “Şin-Bet”in rəhbəri, “Mossad”ın direktoru və İsrail Müdafiə Ordusunun Baş Qərargah rəisi Əl Nəhyanın xəbərdarlığından xəbərdar olmayıb.
Qeyd edək ki, ABŞ Prezidenti Donald Trampın kürəkəni və xüsusi nümayəndəsi Cared Kuşner daha əvvəl HƏMAS-a tərksilahla bağlı sərt ultimatum verib. Onun sözlərinə görə, HƏMAS Qəzzada tərksilah öhdəliyini yerinə yetirməlidir, əks halda İsrailin başladığı hərbi əməliyyatı başa çatdırması mümkündür.
