2025-ci il üzrə Azərbaycanın dövlət büdcəsindən işğaldan azad edilmiş ərazilərin yenidən qurulması və bərpası məqsədilə 4 milyard 465,7 milyon manat vəsait yönəldilib.
"Operativ Məlumat Mərkəzi-OMM" Maliyyə Nazirliyinə istinadən xəbər verir ki, ayrılmış vəsaitin əsas hissəsi birbaşa bərpa və yenidənqurma layihələrinin maliyyələşdirilməsinə sərf olunub. Belə ki, ümumi məbləğin 3 milyard 781,9 milyon manatı və ya 84,7 faizi məhz bu məqsədlər üçün nəzərdə tutulmuş məqsədli vəsaitin payına düşüb.
Məlumata əsasən, ayrılan vəsaitin 373,2 milyon manatı (8,3 faiz) dövlət büdcəsinin ehtiyat fondundan, 258,5 milyon manatı (5,8 faiz) dövlət əsaslı vəsait qoyuluşu – investisiya xərcləri üzrə, 52,1 milyon manatı (1,2 faiz) isə dövlət büdcəsinin digər ehtiyatları hesabına təmin edilib.
Qeyd edək ki, 2024-cü ildə dövlət büdcəsindən işğaldan azad olunmuş ərazilərin yenidən qurulması və bərpası üçün 4 milyard 855,8 milyon manat vəsait ayrılmışdı. Bu isə 2025-ci ildə ayrılan vəsaitin əvvəlki illə müqayisədə nisbətən az olduğunu göstərir.
