OMM Redaksiyası
Fransa Prezidenti Emmanuel Makron 2027-ci ildə vəzifəsini tərk etdikdən sonra yenidən prezidentliyə namizədliyini irəli sürə biləcəyini istisna etməyib.
ABŞ-ın “Variety” jurnalına müsahibəsində Makron bildirib ki, Fransa Konstitusiyasına əsasən prezident ardıcıl olaraq yalnız iki müddət vəzifədə qala bilər. O, ikinci müddətinin gələn ilin mayında başa çatacağını və bundan sonra fransız xalqının yeni prezident seçəcəyini deyib.
“Aydın olaq: Konstitusiyamıza əsasən, ardıcıl iki müddətə seçilmək mümkündür. Buna görə də gələn mayda müddətimi başa çatdıracağam və fransız xalqı başqa birini seçəcək. Amma heç nəyi istisna etmirəm. Geri qayıtmaq olduqca qeyri-adidir, lakin görəcəyik. Həyat bəzən filmlərdən də yaradıcı olur”, – Makron qeyd edib.
Konstitusiya nə deyir?
Fransa Konstitusiyası prezidentin ardıcıl iki müddətdən artıq vəzifədə qalmasına imkan vermir. Makron 2017-ci ildə prezident seçilib və 2022-ci ildə yenidən seçildiyi üçün 2027-ci il prezident seçkisində üçüncü ardıcıl müddətə namizəd ola bilməz.
Konstitusiyada prezidentin bir müddət fasilədən sonra yenidən vəzifəyə qayıtmasını qadağan edən müddəa yoxdur. Bu səbəbdən Makron 2027-ci il seçkisindən kənarda qaldıqdan sonra gələcək seçkilərdə namizədliyini irəli sürə bilər.
Makron əvvəllər nə demişdi?
Makron daha əvvəl prezidentlikdən sonra siyasətlə məşğul olmayacağını bildirmişdi. O, apreldə “Prezidentlikdən əvvəl siyasətlə məşğul olmamışam və prezidentlikdən sonra da məşğul olmayacağam” deyib.
Makronun son açıqlaması isə onun siyasətə, o cümlədən prezidentliyə qayıdış ehtimalını tamamilə istisna etmədiyini göstərir. Müsahibə sentyabrın 7-də Fransanın cənubundakı Sen-Pol-de-Vans şəhərində keçirilən “Lumiere Summit” tədbiri zamanı lentə alınıb və sentyabrın 25-də yayımlanıb.
