Rusiya Prezidentinin mətbuat katibi Dmitri Peskov Ukrayna münaqişəsinin həlli ilə bağlı danışıqların perspektivlərini dəyərləndirib.
“Operativ Məlumat Mərkəzi – OMM” xəbər verir ki, Peskov Moskvada jurnalistlərə açıqlamasında Kiyevin mövqeyinin münaqişənin sülh yolu ilə həlli ehtimalını zəiflətdiyini bildirib.
Kremlin sözçüsü hazırda nikbinlik üçün əsas olmadığını deyib. Onun sözlərinə görə, cəbhədə vəziyyət davam edir və Rusiya “xüsusi hərbi əməliyyatı”nı sürdürür.
Peskov Ukraynaya dəstək verən bəzi ölkələrin müharibədən yorulduğu barədə fikirlərə də münasibət bildirib.
O, bu iddiaların şişirdilməməli olduğunu qeyd edərək, Avropada münaqişəyə cəlb olunmasını artıran dövlətlərin olduğunu deyib. Peskov xüsusilə Böyük Britaniyanı nümunə göstərərək, bəzi ölkələrin Avropa dövlətlərini müharibəni davam etdirməyə təşviq etdiyini iddia edib.
Kremlin sözçüsü böhranın həllinə töhfə verməyə çalışan ölkələrə minnətdar olduqlarını, lakin belə dövlətlərin sayının az olduğunu bildirib.
Dmitri Peskov ABŞ Prezidenti Donald Trampın Yaxın Şərq üzrə xüsusi nümayəndəsi Stiv Uitkoff və onun kürəkəni Cared Kuşnerin Rusiyaya səfər edəcəyi barədə yayılan məlumatlara da toxunub.
Peskov bildirib ki, hazırda belə bir səfərlə bağlı dəqiq məlumat və tarix yoxdur.
Kremlin sözçüsü həmçinin Vladimir Putinin Sankt-Peterburqda konsert verməsi gözlənilən amerikalı repçi Kanye Uestlə görüşməyi planlaşdırmadığını açıqlayıb.
