İtaliyada tələbə və professorlar İsrail Universitetləri ilə bağlanan tədqiqat müqavilələrinin ləğvini tələb edən etiraz aksiyası keçiriblər.
"Operativ Məlumat Mərkəzi-OMM" xarici KİV-ə istinadən xəbər verir ki, iki ölkənin təhsil nazirlikləri arasında akademik əməkdaşlıq həm mülki, həm də hərbi sahələri ehtiva edəcək.
“Hazırki şəraitdə hərbi məqsədlər üçün İsraillə əməkdaşlıq etmək qəbuledilməzdir. Mən bir tələbə olaraq buna qarşı çıxıram. İsrail on minlərlə günahsızın qanını töküb, yüz minlərlə insanı ac-susuz qoyub", – deyə etirazçılardan biri olan hüquq fakültəsinin tələbəsi Anita Palermo deyib.
"İsrailin dinc əhalini və xəstəxanaları bombaladığı, Qəzzalıların aclığa sürükləndiyi və İordan çayının qərb sahilindəki torpaqların hələ də müstəmləkə olunduğu bu tarixi anda ölkəmiz, Xarici İşlər Nazirliyi və xüsusən də universitetimiz bu addımı ata bilməz. Təhsili siyasətə qatmayın deyənlərə səslənirəm. Hazırda məsələ siyasət deyil, gündəlik reallıqdır. Hər gün onlarla uşaq öldürülür. Biz heç nə olmamış kimi davrana və onlarla əməkdaşlıq edə bilmərik" - deyə başqa bir tələbə etirazçı Federiko Manetti deyib.
