"Ukrayna 90 milyard avroluq hərbi maliyyələşdirmə proqramının bir hissəsi olaraq Aİ-dən hava hücumundan müdafiə aktivləri tələb etmir".
“Operativ Məlumat Mərkəzi-OMM” xəbər verir ki, bu sözləri Avropa Komissiyasının sözçüsü Balazs Ujvari deyib.
O qeyd edib ki, Kiyev yalnız zərbə silahları - dronlar, raketlər və təyyarələr istəyir.
“Bizim 90 milyard avroluq maliyyələşdirmə proqramımız var. Ukraynanın ehtiyac duyduğu istənilən silahı tələb etmək qabiliyyətinə malik olduğunu təsdiqləyə bilərəm. Onlar hava hücumundan müdafiə və ya əks-ballistik raket sistemləri tələb edə bilərlər. Lakin indiyə qədər Ukraynanın bütün tələbləri yalnız dronlara, raketlərə və təyyarələrə yönəlib”, - AK sözçüsü vurğulayıb.
Ujvari həmçinin qeyd edib ki, Ukrayna istənilən vaxt tələblərini dəyişə bilər:
“Onlar istədikləri halda istənilən vaxt tələblərini dəyişə bilərlər. Hazırda ukraynalılarla müzakirə etdiyimiz məsələlərin təfərrüatlarını açıqlaya bilmərəm. Lakin deyə bilərəm ki, Avropa Komissiyası Ukraynadan satınalmalarla bağlı müqavilələri rəsmi şəkildə əldə edən kimi onları çox qısa müddətdə, bir neçə gün ərzində nəzərdən keçirə və icraya yönəldə bilər”.
Ujvari əlavə edib ki, Ukraynaya 2026-2027-ci illər üçün nəzərdə tutulan 90 milyard avroluq maliyyələşdirmə proqramı çərçivəsində artıq 9 milyard avrodan çox vəsait istifadə olunub.
