Nüvə təhlükəsizliyinin təmin edilməsi, gərginliyin artmasına və ya qlobal yayılmama rejiminin sarsılmasına səbəb ola biləcək hər hansı hərəkətin qarşısının alınması kritik əhəmiyyət daşıyır.
“Operativ Məlumat Mərkəzi-OMM”-ə məlumatına görə, bu barədə Avropa İttifaqı Şurasının sədri Antoniu Koşta və Avropa Komissiyasının rəhbəri Ursula fon der Lyayenin İrandakı vəziyyətlə bağlı birgə bəyanatında deyilir.
Fon der Lyayen və Koşta İrandakı hadisələrin ciddi narahatlığa səbəb olduğunu qeyd edərək, regiondakı tərəfdaşlarla sıx əlaqə saxladıqlarını vurğulayıblar.
"Biz regional təhlükəsizliyin və sabitliyin təmin edilməsinə sadiqliyimizi bir daha təsdiqləyirik. Yaxın Şərqdəki Aİ vətəndaşlarını hərtərəfli dəstəklə təmin etmək üçün Aİ-nin üzvü olan dövlətlərlə koordinasiyada bütün zəruri tədbirlər görüləcək", – bəyanatda bildirilir.
Bundan başqa, liderlər bütün münaqişə tərəflərini maksimum təmkinlilik nümayiş etdirməyə, mülki əhalini qorumağa və beynəlxalq hüquq normalarına ciddi şəkildə riayət etməyə çağırıblar.
