Çin "Haiyang-2E" peykini orbitə buraxıb.
“Operativ Məlumat Mərkəzi-OMM” xəbər verir ki, Çin dəniz mühitinin dinamik vəziyyətini izləmək üçün nəzərdə tutulan "Haiyang-2E" peykini uğurla orbitə çıxarıb.
Məlumata görə, peyk bu gün səhər saatlarında ölkənin şimal-qərbində yerləşən Jiuquan Peyk Fırlatma Mərkəzindən "Uzun Yürüyüş-4B" (Long March-4B) daşıyıcı raketi ilə kosmosa göndərilib və planlaşdırılan orbitə yerləşdirilib.
Bildirilir ki, "Haiyang-2E" dəniz səthinin vəziyyətini və su hövzələrində baş verən dinamik dəyişiklikləri izləyəcək. Peykdən əldə olunacaq məlumatların elmi tədqiqatlar, dəniz mühitinin monitorinqi və təhlükəsizlik sahəsində istifadə edilməsi nəzərdə tutulur.
Qeyd edək ki, bu buraxılış "Uzun Yürüyüş" raket ailəsinin tarixində 654-cü missiya olub.
