"Elçe" klubunda icarə əsasında çıxış edən sağ cinah müdafiəçisi Ektor Fort yenidən "Barselona"ya qayıdacaq.
"Operativ Məlumat Mərkəzi-OMM" İspaniya mətbuatına istinadən xəbər verir ki, 19 yaşlı futbolçu mövsümqabağı hazırlıq prosesində baş məşqçi Hans-Diter Flikə özünü sübut etmək şansı qazanacaq.
Bununla belə, Kataloniya nəhənginin öz yetirməsini yenidən başqa kluba buraxması istisna edilmir.
Gənc oyunçunun gələcək karyerası bir çox amillərdən, o cümlədən müdafiənin sağ cinahındakı digər futbolçuların vəziyyətindən asılı olacaq.
Cari mövsümdə Ektor Fort "Elçe"nin heyətində ümumilikdə 13 oyun keçirib.
O, bu matçlarda iki qol və iki məhsuldar ötürmə ilə yadda qalıb. İspaniyalı müdafiəçinin "Barselona" ilə mövcud müqaviləsi 2029-cu ilə qədər nəzərdə tutulub.
