İranın xarici işlər naziri Abbas Əraqçi ölkəsinin həm hərbi, həm də diplomatik müstəvidə ciddi uğurlar əldə etdiyini bildirib.
“Operativ Məlumat Mərkəzi – OMM” xəbər verir ki, nazir bu barədə Səhiyyə Nazirliyində keçirilən tədbirdə çıxışı zamanı danışıb.
Əraqçinin sözlərinə görə, ABŞ və İsrailin hücumları ilə başlayan münaqişə zamanı İranın göstərdiyi müqavimət ölkənin “məğlubedilməz güc” olduğunu sübut edib.
Nazir beynəlxalq ictimaiyyətin İranın mövqeyinə münasibətinə də toxunub. O bildirib ki, bir sıra ölkələrin rəsmiləri İranın müqavimətini “möcüzə” kimi qiymətləndiriblər.
Əraqçi qeyd edib ki, heç kim İranın ABŞ-yə qarşı bu cür müqavimət göstərəcəyini və nəticədə qarşı tərəfi danışıqlar masasına oturmağa məcbur edəcəyini gözləmirdi.
Nazir Donald Trampın prezidentliyi dövründə ABŞ-nin İrana qarşı mövqeyini də xatırladıb. Onun sözlərinə görə, Vaşinqton əvvəlcə Tehrandan “şərtsiz təslimiyyət” tələb edib, lakin 20 gün sonra danışıqlar üçün müraciət edib.
Əraqçinin fikrincə, İran xalqı öz hüquqlarını diplomatik yollarla qorumağı bacardığını bütün dünyaya nümayiş etdirib.
