Qarabağ və Şərqi Zəngəzur iqtisadi rayonlarında yerləşən sənaye parklarında hazırda 19-dan çox rezident öz fəaliyyətini davam etdirir. Bu barədə Cəbrayıl, Qubadlı və Zəngilan rayonlarında Azərbaycan Prezidentinin xüsusi nümayəndəsi Vahid Hacıyev Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində məlumat verib.
Vahid Hacıyevin sözlərinə görə, sözügedən sənaye parkları regionun logistika, ticarət və sənaye potensialının artırılmasında mühüm rol oynayır. Bu müəssisələr həm yeni iş yerlərinin yaradılmasına, həm də regionun uzunmüddətli iqtisadi inkişafına töhfə verir.
Xüsusi nümayəndə regionda prioritet sahələrdən biri olan yaşıl enerji istiqamətində görülən işlərə də toxunub:
- Prezident İlham Əliyevin sərəncamı ilə ərazi "yaşıl zona" elan edilib.
- Cəbrayılda xarici şirkət tərəfindən 240 meqavat gücündə Günəş Elektrik Stansiyasının tikintisinə investisiya yatırılır.
- Bundan əlavə, iki şirkət tərəfindən ümumi gücü 100 meqavat olan layihələr icra olunur.
Vahid Hacıyev vurğulayıb ki, formalaşan bu enerji potensialı təkcə Qarabağın tələbatını ödəməyə deyil, həm də artıq qalan hissənin ixracına imkan verəcək.
