Azərbaycanda kənd təsərrüfatı sahəsində müasir suvarma texnologiyalarının tətbiqi ilə bağlı strateji hədəflər müəyyənləşib. Prezident İlham Əliyevin sədrliyi ilə keçirilən müşavirədə çıxış edən kənd təsərrüfatı naziri Məcnun Məmmədov bildirib ki, 2030-cu ilə qədər müasir suvarma sistemlərinin əhatə dairəsinin 300 min hektara çatdırılması nəzərdə tutulur.
Nazirin sözlərinə görə, 2025-ci ildə bu göstərici 130 min hektar təşkil edib. Qarşıya qoyulan məqsədə çatmaq ölkədə məhsuldarlığın artmasına, fermerlərin rifahının yüksəlməsinə və ixrac potensialının güclənməsinə töhfə verəcək. Bu istiqamətdə görüləcək işlər çərçivəsində aşağıdakı tədbirlər planlaşdırılır:
- İki rayonda pilot layihə qismində konsolidasiya və qapalı müasir suvarma şəbəkəsinin qurulması.
- Buğda və pambıq istehsalında məhsuldarlığın hektardan 5 tona çatdırılması.
- Pambıqçılıqda emal dərinliyinin artırılması.
Məcnun Məmmədov qeyd edib ki, məhsuldarlığın yüksəldilməsi üçün suvarma sistemlərinin genişləndirilməsi ilə yanaşı, texniki dəstək, torpaq işlərinin aparılması və yüksək məhsuldar toxumların tətbiqi kimi kompleks tədbirlər həyata keçiriləcək.
