Ağdam, Füzuli və Xocavənd rayonlarında Prezidentin xüsusi nümayəndəsi Emin Hüseynov Bakıda təşkil olunan Ümumdünya Şəhərsalma Forumunun 13-cü sessiyası (WUF13) çərçivəsində keçirilən tədbirdə çıxış edib. O, işğaldan azad edilmiş ərazilərdəki bərpa prosesinin idarəetmədən başlayaraq layihələrin icrasına, mərhələli yanaşmaya və əhalinin geri qayıdışına qədər geniş bir spektri əhatə etdiyini vurğulayıb.
Emin Hüseynovun sözlərinə görə, bərpa və yenidənqurma işləri aparılarkən keçmiş standartlara kor-koranə qayıtmaq əvəzinə, müasir dövrün tələbləri nəzərə alınmalıdır: “Keçmiş Ağdam və Füzuli ilə bağlı nostalji və emosional hisslər mövcuddur. Amma dünya dəyişir, texnologiya inkişaf edir və biz innovasiya, texnologiya əsaslı inkişaf dövründə yaşayırıq. Buna görə də texnologiyanın təqdim etdiyi ən yaxşı imkanlardan istifadə etməliyik”.
