Belarus prezidenti Aleksandr Lukaşenko Suriyada yeni hakimiyyət orqanlarının respublika və Rusiya Federasiyası ilə münasibətləri pozmayacağına əmin olduğunu bildirib.
"Operativ Məlumat Mərkəzi-OMM" xəbər verir ki, bu barədə "BELTA" yazır.
O qeyd edib ki, Suriya lideri Bəşər Əsədin diktator olmaq üçün kifayət qədər resursu yox idi. Bu kontekstdə Lukaşenko belə qənaətə gəlib ki, Yaxın Şərq respublikasında hakimiyyət dəyişikliyi Qərbin iştirakı ilə baş verib.
“Orada kifayət qədər neft və qaz var. Suriyadan keçərək Aralıq dənizi sahillərinə bir yerdən qaz kəməri çəkmək lazımdır. Bütün bunlar Qərbin və amerikalıların marağındadır”, - deyə prezident izah edib.
Dövlət başçısı Dəməşq, Moskva və Minsk arasında münasibətlərin gələcəyindən də danışıb. Onun sözlərinə görə, Suriyada hakimiyyətə gələn güclər Rusiya Federasiyası və Belarusla əməkdaşlıqdan imtina etməyəcəklər.
