Misli Premyer Liqasında XXI tura start verilib.
"Operativ Məlumat Mərkəzi-OMM" xəbər verir ki, açılış oyununda “Kəpəz” Tovuzda “Sabah”ı qəbul edib. Beş qolun vurulduğu qarşılaşma nominal meydan sahiblərinin 3:2 hesablı qələbəsi ilə başa çatıb.
Gəncə klubunun heyətində qolları Mahamadu Ba, Əli Səmədov və Rauf Hüseynli vurublar. Qonaqlarda isə Pavol Şafranko (penalti) və Cesse Sekidika fərqləniblər. Bakı klubu 63-cü dəqiqədə meydanda azlıqda qalıb. İqor Noqeyra ikinci sarıdan qırmızı vərəqə ilə meydandan qovulub.
Bu qələbədən sonra xallarını 17-yə çatdıran “Kəpəz” son sıranı tərk edərək 9-cu pilləyə yüksəlib. “Sabah” isə 28 xalla 5-ci yerdə qalıb.
Günün ikinci görüşündə “Neftçi” doğma meydanda “Şamaxı” ilə qarşılaşacaq. “Neftçi Arena”dakı oyun saat 18:30-da başlayacaq.
Qeyd edək ki, XXI tura fevralın 2-də yekun vurulacaq.
