"Bavariya"nın baş məşqçisi Vensan Kompani komandanın heyətini gücləndirmək istiqamətində ilk addımlarını atıb.
"Operativ Məlumat Mərkəzi-OMM" xarici KİV-ə istinadən xəbər verir ki, belçikalı mütəxəssis Münhen klubunun transfer siyahısında yer alan Nataniel Braunla artıq ilkin danışıqlar aparıb.
Kompani sol cinah müdafiəçisi mövqeyində dərinlik yaratmağı vacib hesab edir.
Buna əsas səbəb kimi Alfonso Devisin tez-tez zədələnməsi və komandadan kənarda qalması göstərilir.
Məhz bu boşluğu doldurmaq üçün "Ayntraxt"ın 22 yaşlı üzvü əsas prioritet hədəf kimi müəyyənləşdirilib.
Mövsüm başa çatdıqdan dərhal sonra Kompani futbolçu ilə əlaqə saxlayaraq öz planlarını onunla bölüşüb. Görünür, baş məşqçinin arqumentləri Braunu inandıra bilib. Almaniyalı müdafiəçinin "Arsenal" və "Real Madrid" kimi nəhəng klubların marağına baxmayaraq, məhz "Bavariya"ya keçməyə meylli olduğu bildirilir.
Qeyd edək ki, "Transfermarkt" portalı oyunçunun bazar dəyərini 40 milyon avro olaraq qiymətləndirir.
