Ermənistanın məhkəmə sistemi keçmiş elitanın maraqlarını əhəmiyyətli dərəcədə qorumağa davam edir, buna görə də yeni Konstitusiyanın qəbul edilməsi vacibdir.
“Operativ Məlumat Mərkəzi-OMM” Ermənistan mediasına istinadən xəbər verir ki, bunu ölkənin Baş naziri Nikol Paşinyan parlamentdə ölkə hökumətinin 2026-2031-ci illər üçün fəaliyyət proqramını təqdim edərkən bildirib.
"Ermənistanın məhkəmə sistemi elitanın və ilk növbədə keçmiş elitanın maraqlarını əhəmiyyətli dərəcədə qorumağa davam edir. Bunun səbəbi yalnız keçmiş elitanın ailə bağlarının məhkəmə sistemində geniş yayılması deyil, həm də institusional problemin mövcudluğudur. Ermənistanın məhkəmə sistemi hakimiyyətin yeganə mənbəyi və daşıyıcısı olan xalqla tam üzvi əlaqəyə malik deyil", - o qeyd edib.
Paşinyan qeyd edib ki, dəyişikliklər nəticəsində korrupsiyalaşmış dairələrin ədalət mühakiməsindən və ədalətdən yayınmaq imkanları əhəmiyyətli dərəcədə azalacaq.
O həmçinin bildirib ki, yeni Konstitusiyada 1990-cı il Müstəqillik Bəyannaməsinə heç bir istinad olmamalıdır: "Yeni Konstitusiyada Müstəqillik Bəyannaməsinə istinad edilməsi Qarabağ hərəkatının davam etdirilməsi, münaqişə məntiqinə qayıdış demək olardı, biz isə buna yol verə bilmərik".
Baş nazir yeni Konstitusiyanın mətninin yaxın aylarda dərc olunacağını bildirib.
