2025-ci ildə Azərbaycan iqtisadiyyatında muzdla çalışan işçilərin orta aylıq nominal əməkhaqqı 2024-cü ilə nisbətən 9,3 % artaraq 1 103 manat təşkil edib.
“Operativ Məlumat Mərkəzi-OMM”-in Dövlət Statistika Komitəsinə istinadən verdiyi məlumata görə, ən yüksək maaşlar mədənçıxarma sənayesi, maliyyə və sığorta, informasiya və rabitə, eləcə də nəqliyyat və anbar təsərrüfatı sahələrində qeydə alınıb.
1 yanvar tarixinə olan ilkin göstəricilərə əsasən, ölkə iqtisadiyyatında muzdla çalışanların ümumi sayı 1 milyon 808 min nəfər olub. Onlardan 865,8 min nəfəri dövlət sektorunda, 942,2 min nəfəri isə qeyri-dövlət sektorunda fəaliyyət göstərir.
Məşğulluğun sahələr üzrə bölgüsündə isə ticarət və nəqliyyat vasitələrinin təmiri (18,6 %), təhsil (18,1 %) və sənaye (13,8 %) sektorları üstünlük təşkil edir.
Digər işçilərin 8,5 %-i səhiyyə, 6,6 %-i tikinti, 6,2 %-i dövlət idarəetməsi, 4,4 %-i nəqliyyat, 3,9 %-i peşə və elmi fəaliyyət, 2,4 %-i kənd təsərrüfatı, 2,4 %-i maliyyə sahələrində, 15,1 %-i isə digər sahələrdə çalışır.
