Bakı-Tbilisi-Qars (BTQ) dəmir yolu xəttinin tam gücü ilə istismara verilməsi Azərbaycan, Gürcüstan və Türkiyənin birgə əməkdaşlığının mühüm göstəricisidir. Türkiyənin nəqliyyat və infrastruktur naziri Əbdülqadir Uraloğlu layihənin rəsmi açılış mərasimində çıxışı zamanı bildirib ki, bu nailiyyət üç ölkənin ortaq vizyonu və səyləri sayəsində mümkün olub.
Nazir çıxışında Gürcüstanın Baş naziri İrakli Kobaxidzeyə və hökumətinə təşəkkürünü çatdırıb, həmçinin Azərbaycanın layihəyə verdiyi dəstəyi yüksək qiymətləndirib. Əbdülqadir Uraloğlunun sözlərinə görə, BTQ sadəcə bir nəqliyyat marşrutu deyil, həm də beynəlxalq miqyasda strateji əhəmiyyət daşıyan təhlükəsiz dəmir yolu qovşağıdır.
Nazir qlobal böhranlar və geosiyasi dəyişikliklər fonunda alternativ, etibarlı nəqliyyat marşrutlarının vacibliyini vurğulayıb:
- Gürcüstan ərazisində aparılan bərpa və tikinti işlərinin tamamlanması ilə BTQ tam gücü ilə fəaliyyətə başlayıb.
- Layihə Orta Dəhlizin inkişafında mərkəzi rol oynayacaq.
- Dəhliz Avropa ilə Asiya arasında yükdaşımaların təhlükəsiz və səmərəli şəkildə genişlənməsinə töhfə verəcək.
Sonda nazir qeyd edib ki, bu layihə region ölkələri arasındakı əməkdaşlığın ən uğurlu nümunələrindən biridir.
