SEPAH və "Hizbullah" Arasındakı Əsas Vasitəçi Necə Zərərsizləşdirildi?
İsrail Müdafiə Ordusu Beyrutda "Hizbullah"ın raket bölməsinə rəhbərlik edən İslam İnqilabı Keşikçiləri Korpusunun (SEPAH) komandiri Məhəmmədini zərərsizləşdirib.
“Operativ Məlumat Mərkəzi-OMM”-in məlumatına görə, bu strateji əməliyyat barədə İsrail ordusunun mətbuat xidməti rəsmi açıqlama yayıb.
Hərbçilərin məlumatına görə, Məhəmmədi "Hizbullah" ilə SEPAH arasında hərbi koordinasiyada əsas fiqur hesab olunurdu. O, həmçinin Livan qruplaşması ilə yüksək rütbəli İran rəsmiləri arasında birbaşa vasitəçi rolunu oynayırdı. Qeyd olunub ki, komandir "Hizbullah"ın raket potensialının artırılmasında mühüm rol oynayıb və "Şimal oxları" əməliyyatından sonra qruplaşmanın imkanlarının bərpasında yaxından iştirak edib.
Bundan əlavə, Məhəmmədi qruplaşmanın strateji silahlar sahəsində əsas mütəxəssislərindən biri hesab edilirdi. İsrail hərbçilərinin məlumatına görə, o, "Şimal oxları" və "Nərildəyən şir" əməliyyatları çərçivəsində İsrail ərazisinə endirilən zərbələri birbaşa koordinasiya edib. İsrail Ordusu "Hizbullah"a qarşı qətiyyətli addımları davam etdirəcəklərini və vətəndaşlarının təhlükəsizliyinə yönəlmiş təhdidlərə yol verməyəcəklərini xüsusi vurğulayıb.
Yaxın Şərqdə Gərginlik: ABŞ və İsrailin İrana Qarşı Birgə Əməliyyatları
Xatırladaq ki, ABŞ və İsrail 28 fevralda İrana qarşı genişmiqyaslı hərbi əməliyyatlara başlayıb. Nəticədə İranın ali rəhbəri ayətullah Əli Xamenei və bir sıra yüksək vəzifəli şəxslər öldürülüb.
Bu hadisələrdən sonra İran İsraillə yanaşı, ABŞ və müttəfiqlərinin hərbi bazalarının yerləşdiyi Səudiyyə Ərəbistanı, Qətər, Birləşmiş Ərəb Əmirlikləri, Oman, Bəhreyn, İraq və Kiprdə müəyyən etdiyi strateji hədəflərə cavab zərbələri endirməyə başlayıb.
