İtaliya A Seriyasında çıxış edən "İnter" klubunun yarımmüdafiəçisi Davide Frattesi karyerasını İngiltərədə davam etdirə bilər.
"Operativ Məlumat Mərkəzi-OMM" "Sky Sport" nəşrinə istinadən xəbər verir ki, "Nottingem Forest" rəhbərliyi artıq ilkin addımlarını atıb.
Klub nümayəndələri futbolçunun agenti və "İnter"in idman direktoru Pyero Auzilio ilə görüş keçiriblər.
Hələlik rəsmi təklif irəli sürülməsə də, tərəflər arasında təmasların qurulduğu təsdiqlənib.
Qeyd edək ki, İngiltərə təmsilçisi bu futbolçu ilə hələ qış transfer pəncərəsi dövründə də maraqlanmışdı.
İtaliyalı oyunçunun "Nottingem Forest"ə keçidə isti baxmadığı barədə əvvəllər məlumatlar yayılmışdı. Buna baxmayaraq, futbolçunun xidmətində maraqlı olan tək klub "meşəlilər" deyil.
İtaliyanın digər nəhəngi "Napoli" də yarımmüdafiəçini heyətinə qatmaq istəyir. Məşhur "Transfermarkt" portalı oyunçunun bazar dəyərini 22 milyon avro olaraq qiymətləndirir.
