ABŞ dövlət katibi Marko Rubio 28 May - Müstəqillik Günü münasibətilə Azərbaycan xalqına təbrik ünvanlayıb. "Operativ Məlumat Mərkəzi-OMM"-in məlumatına görə, təbrik mətni ABŞ Dövlət Departamentinin rəsmi internet səhifəsində yerləşdirilib.
Təbrikdə ABŞ adından Azərbaycan xalqına xoş arzular çatdırılıb və ikitərəfli münasibətlərin inkişafına toxunulub: "Son bir il ərzində əlaqələrimizi strateji tərəfdaşlıq səviyyəsinə yüksəltdik. Bu, vitse-prezident Cey Di Vens və Prezident İlham Əliyev tərəfindən Bakıda Strateji Tərəfdaşlıq Xartiyasının imzalanması ilə təsdiqləndi".
Sənəddə həmçinin tərəfdaşlığın gələcək perspektivləri vurğulanıb:
- Regional infrastruktur, iqtisadi əlaqələr və təhlükəsizlik sahəsində əməkdaşlığın genişləndirilməsi hədəflənir.
- ABŞ Azərbaycanın Cənubi Qafqazda davamlı sülhə sadiqliyini yüksək qiymətləndirir.
- Tərəflər qarşıdakı dövrdə əməkdaşlığı daha da dərinləşdirmək niyyətindədir.
Təbrikdə qeyd olunub ki, rəsmi Vaşinqton Azərbaycanla birgə səyləri davam etdirməyi səbirsizliklə gözləyir.
