Keçmiş məcburi köçkünlərin, yerli sakinlərin, qadınların, gənclərin və həssas qrupların səsləri yenidənqurma prosesinin lap əvvəlindən nəzərə alınmalıdır. Çünki uğurlu bərpa yalnız tikilən evlərin sayı ilə ölçülmür. O, insanların həqiqətən öz evlərinə qayıtdıqlarını hiss edib-etməmələri ilə ölçülür.
“Operativ Məlumat Mərkəzi-OMM” xəbər verir ki, bu fikirləri Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsi Emin Hüseynov BMT-nin Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Böhrandan sonra mənzil bərpa və yenidənqurma işlərinin mərkəzindədir” mövzusunda tədbirdə səsləndirib.
O bildirib ki, bu isə tərəfdaşlıq tələb edir. Hökumətlər, beynəlxalq təşkilatlar, maliyyə institutları, şəhərsalma ekspertləri və yerli icmalar pərakəndə şəkildə deyil, inteqrasiya olunmuş və insan mərkəzli yanaşmalar vasitəsilə birlikdə çalışmalıdırlar. Münaqişələr, iqlim şokları və köçkünlükdən getdikcə daha çox təsirlənən bir dünyada mənzil təminatına artıq ikinci dərəcəli humanitar məsələ kimi baxılmamalıdır.
